Amors me fet conmencier
Une chanson novele
Qu’elle me veut ensoigner
A amer la plus belle
Qui soit ou mont vivant
C’est la bele au cors gent
C’est cele dont je chant:
Dex m’en doint tel novele
Qui soit a mon talent,
Car menu et sovent
Mes cuers por li sautele.
Bien me pourroit avancier
Ma douce dame bele,
S’ele me voloit aidier
A ceste chanconele.
Je n’ain nule rien tant
Conme li soulement
Et son afaitement
Qui mon cuer renouvele.
Amors me lace et prent
Et fait lie et joiant
Por ce qu’a soi m’apele